Gənclər boş vaxtını necə ödənişsiz olaraq səmərəli keçirə bilər? Diqqətini cəlb edəcək qrup və təşkilatları səninlə bölüşdük.

Gənclər boş vaxtını necə ödənişsiz olaraq səmərəli keçirə bilər? Diqqətini cəlb edəcək qrup və təşkilatları səninlə bölüşdük.

Həyatımız boyu enerjimizin ən bol olduğu dönəm hər kəsin bildiyi kimi gənclik dövrümüzdür. Araşdırmalara görə gəncliyini dolu-dolu yaşayan insanlar həyatının qalan hissəsini də xoşbəxt insan olaraq yaşayırlar. Çünki onlara lazım olan müsbət enerjini gənclik illərindən toplayırlar. Belə bir sual verəcəksən: “Bəs hələ iş həyatına atılmayan, qazancı olmayan gənclər bunu necə etsinlər?”. Əyləncəyə, yeni yerlər kəşf etməyə, dünyagörüşünü daha da artırmağa meyilli olan gənclər ödənişsiz olaraq bunları necə edə biləcəklərini axtarırlar. Elə bilirsən mümkün deyil? Əlbəttə ki, mümkündür. Belə ki, bu növ elanların paylaşıldığı qruplar mövcuddur. Onların bir neçəsini səninlə bu məqaləmizdə bölüşürük. Sən də bu qrup və təşkilatlardan yararlanaraq öz əhatəni genişləndirə, vaxtını səmərəli keçirə bilərsən.

1. Aristan

Bu birlik gündəlik olaraq gedə biləcəyin konsert, tamaşa, balet, muzey gəzintiləri və s. kimi tədbirlərin elanlarını bölüşür. Bunların hər biri tam təmənnasızdır. Əlavə olaraq Artistan komandası ölkəmizin gəzməli yerlərinə turlar təşkil edir. Bu turlar sayəsində də kiçik büdcə ilə həm ölkəmizi gəzə, həm də maraqlı kollektivlə birgə həyatına xoş xatirələr yaza bilərsən.

İnstagram: @artistandan

2. Çağdaş Gənclər Portalı

Müasir Azərbaycan gəncliyinin hər tərəfli inkişafına dəstək olmaq üçün təsis edilmiş bir portaldır. Portalda yerli və beynəlxalq səviyyədə layihələr, təlimlər, vebinarlar, həmçinin könüllülük və təcrübə proqramları, şəxsi inkişaf kontentləri və s. paylaşılır.

İnstagram: @azcgp

3. YARAT Müasir İncəsənət Mərkəzi

Bu mərkəzdə daimi olaraq sərgilər və tədbirlər keçirilir. Müasir incəsənəti nümayiş etdirən bu mərkəz dövrümüzün ən maraqlı incəsənət məkanlarından biri sayıla bilər.

İnstagram: @yaratcontemporaryartspace

4. Eventeam

Bu qrup həm İnstagram, həm də tətbiq vasitəsilə ölkədəki bütün ödənişsiz və ödənişli tədbirləri bölüşür. Burada yarışmalar da təşkil olunaraq ödənişli tədbirlərə biletlər hədiyyə olunur. Bütün tədbir proqramlarını bir arada görmək üçün bu tətbiqdən istifadə edə bilərsən.

İnstagram: @eventeam.app

5. Sabunçu Gənclər Evi

Sabunçu Gənclər Evi gənclərlə işin təşkili, onların fərdi və sosial inkişafını qarşısına məqsəd qoyan müəssisədir. Burada müxtəlif tədbirlər, dil kursları, film günləri, musiqi və rəqs dərsləri,vebinarlar, könüllülük proqramları, təlimlər keçirilir. Bu Gənclər Evinə üzv olduqda bütün fəaliyyətlərdən ödənişsiz olaraq yararlana bilərsən.

İnstagram: @sabunchuge